108 திவ்ய தேசங்கள் - 001 - திருவரங்கம் 14

||ஸ்ரீ:||

||ஸ்ரீமதே ராமாநுஜாய நம:||

 ||ஸ்ரீமத் வரவர முநயே நம:|| 

001. திருவரங்கம் 

ஸ்ரீரங்கம் - திருச்சி 

முதலாவது திவ்ய க்ஷேத்ரம்

இந்த திவ்ய தேசத்திற்கான பாசுரங்கள் - 249 - 10

திருமங்கை ஆழ்வார் 

169. திவ்ய ப்ரபந்தம் - 1391 - மாமாயன் என் மகளை மயக்கி விட்டானே!

பெரிய திருமொழி - ஐந்தாம் பத்து - ஐந்தாம் திருமொழி - நான்காம் பாசுரம்

தாய் வாயில் சொல் கேளாள்* 

தன் ஆயத் தோடு அணையாள் தட மென் கொங்கையே* 

ஆரச் சாந்து அணியாள்* எம் பெருமான் திருவரங்கம் எங்கே? என்னும்*

பேய் மாய முலை உண்டு இவ் உலகு உண்ட பெரு வயிற்றன்*

பேசில் நங்காய்*

மா மாயன் என் மகளைச் செய்தனகள்* மங்கைமீர் மதிக்கிலேனே|

170. திவ்ய ப்ரபந்தம் - 1392 - ஆய்ப்பாடி நம்பி என் மகளை எப்படி மாற்றி விட்டான்!

பெரிய திருமொழி - ஐந்தாம் பத்து - ஐந்தாம் திருமொழி - ஐந்தாம் பாசுரம்

பூண் முலைமேல் சாந்து அணியாள்* 

பொரு கயல் கண் மை எழுதாள் பூவை பேணாள்*

ஏண் அறியாள் எத்தனையும்* எம் பெருமான் திருவரங்கம் எங்கே? என்னும்*

நாள் மலராள் நாயகன்* ஆய் நாம் அறிய ஆய்ப்பாடி வளர்ந்த நம்பி*

ஆண் மகன் ஆய் என் மகளைச் செய்தனகள்* அம்மனைமீர் அறிகிலேனே|

171. திவ்ய ப்ரபந்தம் - 1393 - மதுசூதன் என் மகளை என்னவெல்லாம் செய்து விட்டான்!

பெரிய திருமொழி - ஐந்தாம் பத்து - ஐந்தாம் திருமொழி - ஆறாம் பாசுரம்

தாது ஆடு வன மாலை* தாரானோ? என்று என்றே தளர்ந்தாள் காண்மின்*

யாதானும் ஒன்று உரைக்கில்* எம் பெருமான் திருவரங்கம் என்னும்*

பூமேல் மாது ஆளன் குடம் ஆடி மதுசூதன்*

மன்னர்க்கு ஆய் முன்னம் சென்ற தூதாளன்* 

என் மகளைச் செய்தனகள்* எங்ஙனம் நான் சொல்லுகேனே?

172. திவ்ய ப்ரபந்தம் - 1394 - என் மகளது குணத்தை மாற்றி விட்டானே மாயன்!

பெரிய திருமொழி - ஐந்தாம் பத்து - ஐந்தாம் திருமொழி - ஏழாம் பாசுரம்

வார் ஆளும் இளங் கொங்கை* வண்ணம் வேறு ஆயினவாறு எண்ணாள்* 

எண்ணில் பேராளன் பேர் அல்லால் பேசாள்* 

இப் பெண் பெற்றேன் என் செய்கேன் நான்?*

தார் ஆளன் தண் குடந்தை நகர் ஆளன்*

ஐவர்க்கு ஆய் அமரில் உய்த்த தேர் ஆளன்* 

என் மகளைச் செய்தனகள்* எங்ஙனம் நான் செப்புகேனே?

173. திவ்ய ப்ரபந்தம் - 1395 - என் மகள் மாயவன் பெயரையே கூறுகின்றாள்

பெரிய திருமொழி - ஐந்தாம் பத்து - ஐந்தாம் திருமொழி - எட்டாம் பாசுரம்

உறவு ஆதும் இலள் என்று என்று* ஒழியாது பலர் ஏசும் அலர் ஆயிற்றால்*

மறவாதே எப்பொழுதும்* மாயவனே மாதவனே என்கின்றாளால்*

பிறவாத பேராளன் பெண் ஆளன் மண் ஆளன்* 

விண்ணோர் தங்கள் அறவாளன்* 

என் மகளைச் செய்தனகள்* அம்மனைமீர் அறிகிலேனே|

174. திவ்ய ப்ரபந்தம் - 1396 - அரங்கன் வந்தானா என்கின்றாள்

பெரிய திருமொழி - ஐந்தாம் பத்து - ஐந்தாம் திருமொழி - ஒண்பதாம் பாசுரம் 

பந்தோடு கழல் மருவாள்* பைங் கிளியும் பால் ஊட்டாள் பாவை பேணாள்*

வந்தானோ திருவரங்கன்?* வாரானோ? என்று என்றே வளையும் சோரும்*

சந்தோகன் பௌழியன்* ஐந் தழல் ஓம்பு தைத்திரியன் சாமவேதி*

அந்தோ வந்து என் மகளைச் செய்தனகள்* அம்மனைமீர் அறிகிலேனே|

175. திவ்ய ப்ரபந்தம் - 1397 - இவற்றைப் படிப்போர் பொன்னுலகில் வாழ்வர்

பெரிய திருமொழி - ஐந்தாம் பத்து - ஐந்தாம் திருமொழி - பத்தாம் பாசுரம்

சேல் உகளும் வயல் புடை சூழ்* திருவரங்கத்து அம்மானைச் சிந்தைசெய்த*

நீல மலர்க் கண் மடவாள் நிறை அழிவைத்* தாய் மொழிந்த அதனை*

நேரார் கால வேல் பரகாலன்* கலிகன்றி ஒலி மாலை கற்று வல்லார்*

மாலை சேர் வெண் குடைக்கீழ் மன்னவர் ஆய்ப்* 

பொன் உலகில் வாழ்வர் தாமே|

176. திவ்ய ப்ரபந்தம் - 1398 - திருமாலைத் தென்னரங்கத்தில் கண்டேன்

பெரிய திருமொழி - ஐந்தாம் பத்து - ஆறாம் திருமொழி - முதலாம் பாசுரம்

கைம் மான மழ களிற்றைக்* கடல் கிடந்த கருமணியை*

மைம் மான மரதகத்தை* மறை உரைத்த திருமாலை*

எம்மானை எனக்கு என்றும் இனியானைப்* பனி காத்த அம்மானை* 

யான் கண்டது* அணி நீர்த் தென் அரங்கத்தே|

177. திவ்ய ப்ரபந்தம் - 1399 - உலகேழும் உண்டவனை அரங்கத்தில் கண்டேன்

பெரிய திருமொழி - ஐந்தாம் பத்து - ஆறாம் திருமொழி - இரண்டாம் பாசுரம்

பேரானைக்* குறுங்குடி எம் பெருமானை* 

திருத்தண்கால் ஊரானைக்* கரம்பனூர் உத்தமனை* 

முத்து இலங்கு கார் ஆர் திண் கடல் ஏழும்* மலை ஏழ் இவ் உலகு ஏழ் உண்டும்*

ஆராது என்று இருந்தானைக்* கண்டது தென் அரங்கத்தே|

178. திவ்ய ப்ரபந்தம் - 1400 - அடியார் மனத்தில் இருப்பவன் அரங்கன்

பெரிய திருமொழி - ஐந்தாம் பத்து - ஆறாம் திருமொழி - மூன்றாம் பாசுரம்

ஏன் ஆகி உலகு இடந்து* அன்று இரு நிலனும் பெரு விசும்பும்*

தான் ஆய பெருமானை* தன் அடியார் மனத்து என்றும்**

8தேன் ஆகி அமுது ஆகித்* திகழ்ந்தானை மகிழ்ந்து ஒரு கால்*

ஆன்-ஆயன் ஆனானைக்* கண்டது தென் அரங்கத்தே|

179. திவ்ய ப்ரபந்தம் - 1401 - இரணியனை அழித்தவன் இடம் அரங்கம்

பெரிய திருமொழி - ஐந்தாம் பத்து - ஆறாம் திருமொழி - நான்காம் பாசுரம்

வளர்ந்தவனைத் தடங் கடலுள்* வலி உருவில் திரி சகடம்*

தளர்ந்து உதிர உதைத்தவனைத்* 

தரியாது அன்று இரணியனைப் பிளந்தவனை*

பெரு நிலம் ஈர் அடி நீட்டிப்* பண்டு ஒருநாள் அளந்தவனை* 

யான் கண்டது*  அணி நீர்த் தென் அரங்கத்தே|

180. திவ்ய ப்ரபந்தம் - 1402 - யாகங்களில் அவி உணவை உண்பவன் இடம்

பெரிய திருமொழி - ஐந்தாம் பத்து - ஆறாம் திருமொழி - ஐந்தாம் பாசுரம்

நீர் அழல் ஆய்* நெடு நிலன் ஆய் நின்றானை* 

அன்று அரக்கன் ஊர் அழலால் உண்டானைக்* கண்டார் பின் காணாமே**

பேர் அழல் ஆய்ப் பெரு விசும்பு ஆய்ப்* பின் மறையோர் மந்திரத்தின்*

ஆர் அழலால் உண்டானைக்* கண்டது தென் அரங்கத்தே|

181. திவ்ய ப்ரபந்தம் - 1403 - கம்சனைக் கொன்றவன் அரங்கன்

பெரிய திருமொழி - ஐந்தாம் பத்து - ஆறாம் திருமொழி - ஆறாம் பாசுரம்

தம் சினத்தைத் தவிர்த்து அடைந்தார்* தவ நெறியை தரியாது*

கஞ்சனைக் கொன்று* அன்று உலகம் உண்டு உமிழ்ந்த கற்பகத்தை**

வெம் சினத்த கொடுந் தொழிலோன்* விசை உருவை அசைவித்த*

அம் சிறைப் புள் பாகனை* யான் கண்டது தென் அரங்கத்தே|

182. திவ்ய ப்ரபந்தம் - 1404 - என் உள்ளத்தே உறைபவன் அரங்கன்

பெரிய திருமொழி - ஐந்தாம் பத்து - ஆறாம் திருமொழி - ஏழாம் பாசுரம்

சிந்தனையைத் தவநெறியைத்* திருமாலை* 

பிரியாது வந்து எனது மனத்து இருந்த* வடமலையை*

வரி வண்டு ஆர் கொந்து அணைந்த பொழில் கோவல்* 

உலகு அளப்பான் அடி நிமிர்த்த அந்தணனை* 

யான் கண்டது* அணி நீர்த் தென் அரங்கத்தே|

183. திவ்ய ப்ரபந்தம் - 1405 - யாவர்க்கும் பிரான் அரங்கன்

பெரிய திருமொழி - ஐந்தாம் பத்து - ஆறாம் திருமொழி - எட்டாம் பாசுரம்

துவரித்த உடையவர்க்கும்* தூய்மை இல்லாச் சமணர்க்கும்*

அவர்கட்கு அங்கு அருள் இல்லா* அருளானை*

தன் அடைந்த எமர்கட்கும் அடியேற்கும்* எம்மாற்கும் எம் அனைக்கும்*

அமரர்க்கும் பிரானாரைக்* கண்டது தென் அரங்கத்தே|

184. திவ்ய ப்ரபந்தம் - 1406 - மெய்யார்க்கு மெய்யன் அரங்கன்

பெரிய திருமொழி - ஐந்தாம் பத்து - ஆறாம் திருமொழி - ஒண்பதாம் பாசுரம்

பொய் வண்ணம் மனத்து அகற்றிப்* புலன் ஐந்தும் செல வைத்து*

மெய் வண்ணம் நினைந்தவர்க்கு* மெய்ந் நின்ற வித்தகனை**

மை வண்ணம் கரு முகில்போல்* திகழ் வண்ணம் மரதகத்தின்*

அவ் வண்ண வண்ணனை* யான் கண்டது தென் அரங்கத்தே

185. திவ்ய ப்ரபந்தம் - 1407 - இவற்றைப் பாராயணம் செய்க: தீவினை தீரும்

பெரிய திருமொழி - ஐந்தாம் பத்து - ஆறாம் திருமொழி - பத்தாம் பாசுரம்

ஆ மருவி நிரை மேய்த்த* அணி அரங்கத்து அம்மானை*

காமரு சீர்க் கலிகன்றி* ஒலிசெய்த மலி புகழ் சேர்**

நா மருவு தமிழ் மாலை* நால் இரண்டோடு இரண்டினையும்*

தாம் மருவி வல்லார் மேல்* சாரா தீவினை தானே|

||ஹரி ஓம்||

||ஸ்ரீ ஆழ்வார் திருவடிகளே சரணம்||

||ஸ்ரீ எம்பெருமானார் திருவடிகளே சரணம்||

||ஸ்ரீ ஜீயர் திருவடிகளே சரணம்||

||ஸ்ரீ அஸ்மத்  ஆசார்யன் திருவடிகளே சரணம்||

தொடரும்