108 திவ்ய தேசங்கள் - 001 - திருவரங்கம் 9

||ஸ்ரீ:||

||ஸ்ரீமதே ராமாநுஜாய நம:||

||ஸ்ரீமத் வரவர முநயே நம:||

001. திருவரங்கம் 

ஸ்ரீரங்கம் - திருச்சி 

முதலாவது திவ்ய க்ஷேத்ரம்

இந்த திவ்ய தேசத்திற்கான பாசுரங்கள் - 249 - 5

குலசேகராழ்வார்

069. திவ்ய ப்ரபந்தம் - 668 - அரங்கனிடமே மயங்குகிறேன்

பெருமாள் திருமொழி - மூன்றாம் திருமொழி - முதலாம் பாசுரம்

மெய் இல் வாழ்க்கையை* மெய் எனக் கொள்ளும்* 

இவ் வையம் தன்னொடும்* கூடுவது இல்லை யான்*

ஐயனே* அரங்கா என்று அழைக்கின்றேன்*

மையல் கொண்டொழிந்தேன்* என் தன் மாலுக்கே| (2)

070. திவ்ய ப்ரபந்தம் - 669 - மாலிடம் மால் கொண்டேன்

பெருமாள் திருமொழி - மூன்றாம் திருமொழி - இரண்டாம் பாசுரம்

நூலின் நேர் இடையார்* திறத்தே நிற்கும்* 

ஞாலம் தன்னொடும்* கூடுவது இல்லை யான்*

ஆலியா அழையா* அரங்கா என்று* 

மால் எழுந்தொழிந்தேன்* என் தன் மாலுக்கே|

071. திவ்ய ப்ரபந்தம் - 670 -  நான் அரங்கனின் பித்தன்

பெருமாள் திருமொழி - மூன்றாம் திருமொழி - மூன்றாம் பாசுரம்

மாரனார்* வரி வெஞ் சிலைக்கு ஆட்செய்யும்* 

பாரினாரொடும்* கூடுவது இல்லை யான்*

ஆர மார்வன்* அரங்கன் அனந்தன்* 

நல் நாரணன்* நரகாந்தகன் பித்தனே|

072. திவ்ய ப்ரபந்தம் - 671 - நான் அரங்கனின் பக்தன்

பெருமாள் திருமொழி - மூன்றாம் திருமொழி - நான்காம் பாசுரம்

உண்டியே உடையே* உகந்து ஓடும்,* 

இம் மண்டலத்தொடும்* கூடுவது இல்லை யான்*

அண்டவாணன்* அரங்கன் வன் பேய் முலை*

உண்ட வாயன் தன்* உன்மத்தன் காண்மினே|

073. திவ்ய ப்ரபந்தம் - 672 - தாமரைப் பேதை மணாளனின் பித்தன்

பெருமாள் திருமொழி - மூன்றாம் திருமொழி - ஐந்தாம் பாசுரம்

தீதில் நன்னெறி நிற்க* அல்லாது செய்*

நீதியாரொடும்* கூடுவது இல்லை யான்*

ஆதி ஆயன்* அரங்கன் அந் தாமரைப்* 

பேதை மா மணவாளன்* தன் பித்தனே|

074. திவ்ய ப்ரபந்தம் - 673 - எம்பிரானுக்கே எழுமையும் பித்தன்

பெருமாள் திருமொழி - மூன்றாம் திருமொழி - ஆறாம் பாசுரம்

எம் பரத்தர்* அல்லாரொடும் கூடலன்*

உம்பர் வாழ்வை* ஒன்றாகக் கருதலன்*

தம்பிரான் அமரர்க்கு* அரங்க நகர்*

எம்பிரானுக்கு* எழுமையும் பித்தனே|

075. திவ்ய ப்ரபந்தம் - 674 - அத்தனே அரங்கா என்கின்றேன்

பெருமாள் திருமொழி - மூன்றாம் திருமொழி - ஏழாம் பாசுரம்

எத் திறத்திலும்* யாரொடும் கூடும்* 

அச்சித்தந் தன்னைத்* தவிர்த்தனன் செங்கண் மால்*

அத்தனே* அரங்கா என்று அழைக்கின்றேன்*

பித்தனாய் ஒழிந்தேன்* எம்பிரானுக்கே|

076. திவ்ய ப்ரபந்தம் - 675 - பேயரே எனக்கு யாவரும்

பெருமாள் திருமொழி - மூன்றாம் திருமொழி - எட்டாம் பாசுரம்

பேயரே* எனக்கு யாவரும்* 

யானும் ஓர் பேயனே* எவர்க்கும் இது பேசி என்*

ஆயனே!* அரங்கா என்று அழைக்கின்றேன்*

பேயனாய் ஒழிந்தேன்* எம்பிரானுக்கே|

077. திவ்ய ப்ரபந்தம் - 676 - அரங்கனின் பக்தர்க்குத் துன்பம் இல்லை

பெருமாள் திருமொழி - மூன்றாம் திருமொழி - ஒண்பதாம் பாசுரம்

அங்கை ஆழி* அரங்கன் அடியிணை*

தங்கு சிந்தைத்* தனிப் பெரும் பித்தனாய்க்*

கொங்கர்கோன்* குலசேகரன் சொன்ன சொல்*

இங்கு வல்லவர்க்கு* ஏதம் ஒன்று இல்லையே| (2)

078. திவ்ய ப்ரபந்தம் - 728 - யாவரையும் படைத்தவனே! தாலேலோ

பெருமாள் திருமொழி - எட்டாம் திருமொழி - பத்தாம் பாசுரம் 

தேவரையும் அசுரரையும்* திசைகளையும் படைத்தவனே* 

யாவரும் வந்து அடி வணங்க* அரங்கநகர்த் துயின்றவனே* 

காவிரி நல் நதி பாயும்* கணபுரத்து என் கருமணியே* 

ஏ வரி வெஞ்சிலை வலவா* இராகவனே தாலேலோ| (2)

திருமழிசை ஆழ்வார் 

079. திவ்ய ப்ரபந்தம் - 772 - கடல் கடைந்த போது அசுரர்கள் என் செய்தனர்?

திருச்சந்த விருத்தம் - மூன்றாம் திருமொழி - முதலாம் பாசுரம் (21)

அரங்கனே! தரங்க நீர்* கலங்க அன்று குன்று சூழ்* 

மரங்கள் தேய மாநிலம் குலுங்க* மாசுணம் சுலாய்*

நெருங்க நீ கடைந்த போது* நின்ற சூரர் என் செய்தார்?* 

குரங்கை ஆள் உகந்த எந்தை!* கூறு தேற வேறு இதே|

080. திவ்ய ப்ரபந்தம் - 800 - நாதனின் ஊர் அரங்கம்

திருச்சந்த விருத்தம் - ஐந்தாம் திருமொழி - முதலாம் பாசுரம் (49)

கொண்டை கொண்ட கோதை மீது* தேன் உலாவு கூனி கூன்* 

உண்டை கொண்டு அரங்க ஓட்டி* உள் மகிழ்ந்த நாதன் ஊர்*

நண்டை உண்டு நாரை பேர* வாளை பாய நீலமே* 

அண்டை கொண்டு கெண்டை மேயும்* அந்தண் நீர் அரங்கமே|

081. திவ்ய ப்ரபந்தம் - 801 - வில் வீரரின் ஊர் அரங்கம்

திருச்சந்த விருத்தம் - ஐந்தாம் திருமொழி - இரண்டாம் பாசுரம் (50)

வெண் திரைக் கரும் கடல்* சிவந்து வேவ முன் ஒர் நாள்* 

திண் திறல் சிலைக் கை வாளி* விட்ட வீரர் சேரும் ஊர்*

எண் திசைக் கணங்களும்* இறைஞ்சி ஆடு தீர்த்த நீர்* 

வண்டு இரைத்த சோலை வேலி* மன்னு சீர் அரங்கமே|

082. திவ்ய ப்ரபந்தம் - 802 - பிரமன் பணிந்த கோயில் அரங்கம்

திருச்சந்த விருத்தம் - ஆறாம் திருமொழி - முதலாம் பாசுரம் (51)

சரங்களைத் துரந்து* வில் வளைத்து இலங்கை மன்னவன்* 

சிரங்கள் பத்து அறுத்து உதிர்த்த* செல்வர் மன்னு பொன் இடம்*

பரந்து பொன் நிரந்து நுந்தி* வந்து அலைக்கும் வார் புனல்* 

அரங்கம் என்பர் நான்முகத்து அயன் பணிந்த* கோயிலே|

083. திவ்ய ப்ரபந்தம் - 803 - பற்றற்றவர்கள் சூழ்ந்து வாழும் ஊர் அரங்கம்

திருச்சந்த விருத்தம் - ஆறாம் திருமொழி - இரண்டாம் பாசுரம் (52)

பொற்றை உற்ற முற்றல் யானை* போர் எதிர்ந்து வந்ததைப்* 

பற்றி உற்று மற்ற தன்* மருப்பு ஒசித்த பாகன் ஊர்*

சிற்றெயிற்று முற்றல் மூங்கில்* மூன்று தண்டர் ஒன்றினர்* 

அற்றபற்றர் சுற்றி வாழும்* அந்தண் நீர் அரங்கமே|

084. திவ்ய ப்ரபந்தம் - 804 - வாணனைக் கொன்றவன் ஊர் அரங்கம்

திருச்சந்த விருத்தம் - ஆறாம் திருமொழி - மூன்றாம் பாசுரம் (53)

மோடியோடு இலச்சையாய* சாபம் எய்தி முக்கணான்* 

கூடுசேனை மக்களோடு* கொண்டு மண்டி வெஞ்சமத்து ஓட* 

வாணன் ஆயிரம்* கரங்கழித்த ஆதிமால்* 

பீடு கோயில் கூடுநீர்* அரங்கம் என்ற பேரதே|

085. திவ்ய ப்ரபந்தம் - 805 - இலங்கையை அழித்தவன் தங்கும் ஊர் அரங்கம்

திருச்சந்த விருத்தம் - ஆறாம் திருமொழி - நான்காம் பாசுரம் (54)

இலைத் தலைச் சரம் துரந்து* இலங்கை கட்டழித்தவன்* 

மலைத் தலைப் பிறந்து இழிந்து* வந்து நுந்து சந்தனம்*

குலைத்து அலைத்து இறுத்து எறிந்த* குங்குமக் குழம்பினோடு* 

அலைத்து ஒழுகு காவிரி* அரங்கம் மேய அண்ணலே|

086. திவ்ய ப்ரபந்தம் - 806 - உன் பாதங்களை என் மனத்தில் தங்க வைத்தாயே!

திருச்சந்த விருத்தம் - ஆறாம் திருமொழி - ஐந்தாம் பாசுரம் (55)

மன்னு மாமலர்க் கிழத்தி* வைய மங்கை மைந்தனாய்* 

பின்னும் ஆயர் பின்னை தோள்* மணம் புணர்ந்து அது அன்றியும்*

உன்ன பாதம் என்ன சிந்தை* மன்ன வைத்து நல்கினாய்* 

பொன்னி சூழ் அரங்கம் மேய* புண்டரீகன் அல்லையே|

087. திவ்ய ப்ரபந்தம் - 844 - அம்பு எய்த வில்லி ராமன்

திருச்சந்த விருத்தம் - பத்தாம் திருமொழி - மூன்றாம் பாசுரம் (93)

சுரும்பு அரங்கு தண் துழாய்* துதைந்து அலர்ந்த பாதமே* 

விரும்பி நின்று இறைஞ்சுவேற்கு* இரங்கு அரங்க வாணனே*

கரும்பு இருந்த கட்டியே!* கடல் கிடந்த கண்ணனே* 

இரும்பு அரங்க வெஞ்சரம்* துரந்த வில் இராமனே|

088. திவ்ய ப்ரபந்தம் - 870 - நின்னை நினைந்தால் வாட்டம் நீங்கும்

திருச்சந்த விருத்தம் - பன்னிரெண்டாம் திருமொழி - ஒண்பதாம் பாசுரம் (119)

பொன்னி சூழ் அரங்கம் மேய* பூவை வண்ண! மாய! கேள்* 

என்னது ஆவி என்னும்* வல்வினையினுட் கொழுந்து எழுந்து*

உன்ன பாதம் என்னநின்ற* ஒண் சுடர்க் கொழு மலர்* 

மன்ன வந்து பூண்டு* வாட்டம் இன்றி எங்கும் நின்றதே| (2)

||ஹரி ஓம்||

||ஸ்ரீ ஆழ்வார் திருவடிகளே சரணம்||

||ஸ்ரீ எம்பெருமானார் திருவடிகளே சரணம்||

||ஸ்ரீ ஜீயர் திருவடிகளே சரணம்||

||ஸ்ரீ அஸ்மத்  ஆசார்யன் திருவடிகளே சரணம்||

தொடரும்