108 திவ்ய தேசங்கள் - 034 - திருவாலி – திருநகரி 3

||ஸ்ரீ:||

||ஸ்ரீமதே ராமாநுஜாய நம:||

||ஸ்ரீமத் வரவர முநயே நம:||

034. திருவாலி – திருநகரி (திருநாங்கூர்)

முப்பத்தி நான்காவது திவ்ய க்ஷேத்ரம்

இந்த திவ்ய தேசத்திற்கான பாசுரங்கள் - 42 - 1

001. திவ்ய ப்ரபந்தம் - 725 - அயோத்தி மன்னனே! தாலேலோ

பெருமாள் திருமொழி - எட்டாம் திருமொழி - ஏழாம் பாசுரம்

ஆலின் இலைப் பாலகனாய்* அன்று உலகம் உண்டவனே*

வாலியைக் கொன்று அரசு* இளைய வானரத்துக்கு அளித்தவனே*

காலின் மணி கரை அலைக்கும்* கணபுரத்து என் கருமணியே*

ஆலி நகர்க்கு அதிபதியே* அயோத்திமனே தாலேலோ|

002. திவ்ய ப்ரபந்தம் - 1078 - நால்வகைத் திருக்கோலங் கொண்டவன் இடம்

பெரிய திருமொழி - இரண்டாம் பத்து - நான்காம் திருமொழி - முதலாம் பாசுரம்

அன்று ஆயர் குலக் கொடியோடு* அணி மா மலர் மங்கையொடு அன்பு அளவி*

அவுணர்க்கு என்றானும் இரக்கம் இலாதவனுக்கு* உறையும் இடம் ஆவது* 

இரும் பொழில் சூழ் நன்று ஆய புனல் நறையூர் திருவாலி குடந்தை* 

தடம் திகழ் கோவல்நகர்*

நின்றான் இருந்தான் கிடந்தான் நடந்தாற்கு இடம்* 

மா மலை ஆவது நீர்மலையே|

003. திவ்ய ப்ரபந்தம் - 1188 - சிந்தனைக்கு இனியான் திருவாலி அம்மான்

பெரிய திருமொழி - மூன்றாம் பத்து - ஐந்தாம் திருமொழி - முதலாம் பாசுரம்

வந்து உனது அடியேன் மனம் புகுந்தாய்* புகுந்ததன் பின் வணங்கும்* 

என் சிந்தனைக்கு இனியாய்* திருவே என் ஆர் உயிரே*

அம் தளிர் அணி ஆர்* அசோகின் இளந்தளிர்கள் கலந்து* 

அவை எங்கும் செந் தழல் புரையும்* திருவாலி அம்மானே|

004. திவ்ய ப்ரபந்தம் - 1189 - அடியேன் மனத்திருந்த அணியாலி அம்மான்

பெரிய திருமொழி - மூன்றாம் பத்து - ஐந்தாம் திருமொழி - இரண்டாம் பாசுரம்

நீலத் தட வரை மா மணி நிகழக்* கிடந்தது போல் அரவு அணை*

வேலைத் தலைக் கிடந்தாய்* அடியேன் மனத்து இருந்தாய்*

சோலைத்தலைக் கண மா மயில் நடம் ஆட* மழை முகில் போன்று எழுந்து* 

எங்கும் ஆலைப் புகை கமழும்* அணி ஆலி அம்மானே|

005. திவ்ய ப்ரபந்தம் - 1190 - மனத்தில் நிலை பெற்றவன் ஆலி அம்மான்

பெரிய திருமொழி - மூன்றாம் பத்து - ஐந்தாம் திருமொழி - மூன்றாம் பாசுரம்

நென்னல் போய் வரும் என்று என்று எண்ணி* இராமை என் மனத்தே புகுந்தது*

இம்மைக்கு என்று இருந்தேன்* எறி நீர் வளஞ் செறுவில்*

செந்நெல் கூழை வரம்பு ஒரீஇ அரிவார்* முகத்து எழு வாளை போய்* கரும்பு

அந் நல் நாடு அணையும்* அணி ஆலி அம்மானே|

006. திவ்ய ப்ரபந்தம் - 1191 - நின் திருவடிகளை மறக்காமல் இருக்க அருள் செய்தாயே!

பெரிய திருமொழி - மூன்றாம் பத்து - ஐந்தாம் திருமொழி - நான்காம் பாசுரம்

மின்னின் மன்னும் நுடங்கு இடை* மடவார் தம் சிந்தை மறந்து வந்து* 

நின் மன்னு சேவடிக்கே* மறவாமை வைத்தாயால்*

புன்னை மன்னு செருந்தி* வண் பொழில் வாய் அகன் பணைகள் கலந்து* 

எங்கும் அன்னம் மன்னும் வயல்* அணி ஆலி அம்மானே|

007. திவ்ய ப்ரபந்தம் - 1192 - அம்மானே! என்னை விட்டு நீங்க நினையாதே

பெரிய திருமொழி - மூன்றாம் பத்து - ஐந்தாம் திருமொழி - ஐந்தாம் பாசுரம்

நீடு பல் மலர் மாலை இட்டு* நின் இணை அடி தொழுது ஏத்தும்* 

என் மனம் வாட நீ நினையேல்* மரம் எய்த மா முனிவா*

பாடல் இன் ஒலி சங்கின் ஓசை* பரந்து பல் பணையால் மலிந்து* 

எங்கும் ஆடல் ஓசை அறா* அணி ஆலி அம்மானே|

008. திவ்ய ப்ரபந்தம் - 1193 - அம்மானே! நீ எங்கும் செல்ல விட மாட்டேன்

பெரிய திருமொழி - மூன்றாம் பத்து - ஐந்தாம் திருமொழி - ஆறாம் பாசுரம்

கந்த மா மலர் எட்டும் இட்டு* நின் காமர் சேவடி கைதொழுது எழும்*

புந்தியேன் மனத்தே* புகுந்தாயைப் போகலொட்டேன்*

சந்தி வேள்வி சடங்கு நான்மறை* ஓதி ஓதுவித்து ஆதியாய் வரும்*

அந்தணாளர் அறா* அணி ஆலி அம்மானே|

009. திவ்ய ப்ரபந்தம் - 1194 - புண்ணியனே! உன்னை நான் விட மாட்டேன்

பெரிய திருமொழி - மூன்றாம் பத்து - ஐந்தாம் திருமொழி - ஏழாம் பாசுரம்

உலவு திரைக் கடல் பள்ளிகொண்டு வந்து* உன் அடியேன் மனம் புகுந்த* 

அப்புலவ புண்ணியனே* புகுந்தாயைப் போகலொட்டேன்*

நிலவு மலர்ப் புன்னை நாழல் நீழல்* தண் தாமரை மலரின் மிசை* 

மலி அலவன் கண்படுக்கும்* அணி ஆலி அம்மானே|

010. திவ்ய ப்ரபந்தம் - 1195 - திருவாலி அம்மானே! என் மனத்தில் புகுந்து விட்டாய்

பெரிய திருமொழி - மூன்றாம் பத்து - ஐந்தாம் திருமொழி - எட்டாம் பாசுரம்

சங்கு தங்கு தடங் கடல்* கடல் மல்லையுள் கிடந்தாய்* 

அருள் புரிந்து இங்கு என்னுள் புகுந்தாய்* இனிப் போயினால் அறையோ!*

கொங்கு செண்பகம் மல்லிகை மலர் புல்கி* இன் இள வண்டு போய்* 

இளந் தெங்கின் தாது அளையும்* திருவாலி அம்மானே|

011. திவ்ய ப்ரபந்தம் - 1196 - ஆயிரம் நாமமும் கூறினேன்; ஒரு சொல் உரை

பெரிய திருமொழி - மூன்றாம் பத்து - ஐந்தாம் திருமொழி - ஒண்பதாம் பாசுரம்

ஓதி ஆயிரம் நாமமும் பணிந்து ஏத்தி* நின் அடைந்தேற்கு* 

ஒரு பொருள் வேதியா அரையா* உரையாய் ஒரு மாற்றம்* 

எந்தாய் நீதி ஆகிய வேத மா முனி யாளர்* தோற்றம் உரைத்து* 

மற்றவர்க்கு ஆதி ஆய் இருந்தாய்* அணி ஆலி அம்மானே|

012. திவ்ய ப்ரபந்தம் - 1197 - இவற்றைப் பாடுவோர்க்கு இடம் வானுலகு

பெரிய திருமொழி - மூன்றாம் பத்து - ஐந்தாம் திருமொழி - பத்தாம் பாசுரம்

புல்லி வண்டு அறையும் பொழில் புடை சூழ்* தென் ஆலி இருந்த மாயனை*

கல்லின் மன்னு திண் தோள்* கலியன் ஒலி செய்த*

நல்ல இன் இசை மாலை* நாலும் ஓர் ஐந்தும் ஒன்றும் நவின்று தாம்* 

உடன் வல்லர் ஆய் உரைப்பார்க்கு* இடம் ஆகும் வான் உலகே|

013. திவ்ய ப்ரபந்தம் - 1198 - வண்டே! திருவாலிப் பெருமானிடம் எனது நிலையை உரை

பெரிய திருமொழி - மூன்றாம் பத்து - ஆறாம் திருமொழி - முதலாம் பாசுரம்

தூ விரிய மலர் உழக்கித்* துணையோடும் பிரியாதே*

பூ விரிய மது நுகரும்* பொறி வரிய சிறு வண்டே*

தீ விரிய மறை வளர்க்கும்* புகழ் ஆளர் திருவாலி*

ஏ வரி வெம் சிலையானுக்கு* என் நிலைமை உரையாயே|

014. திவ்ய ப்ரபந்தம் - 1199 - வண்டே! மணவாளனிடம் என் காதலைச் சொல்

பெரிய திருமொழி - மூன்றாம் பத்து - ஆறாம் திருமொழி - இரண்டாம் பாசுரம்

பிணி அவிழு நறு நீல* மலர் கிழியப் பெடையோடும்*

அணி மலர்மேல் மது நுகரும்* அறு கால சிறு வண்டே*

மணி கழுநீர் மருங்கு அலரும்* வயல் ஆலி மணவாளன் பணி அறியேன்* 

நீ சென்று* என் பயலை நோய் உரையாயே|

015. திவ்ய ப்ரபந்தம் - 1200 - குருகே! மணவாளனிடம் குறிப்பறிந்து கூறு

பெரிய திருமொழி - மூன்றாம் பத்து - ஆறாம் திருமொழி - மூன்றாம் பாசுரம்

நீர் வானம் மண் எரி கால் ஆய்* நின்ற நெடுமால்* 

தன் தார் ஆய நறுந் துளவம்* பெறும் தகையேற்கு அருளானே*

சீர் ஆரும் வளர் பொழில் சூழ்* திருவாலி வயல் வாழும்*

கூர் வாய சிறு குருகே* குறிப்பு அறிந்து கூறாயே|

016. திவ்ய ப்ரபந்தம் - 1201 - வண்டே! எனது நோயை மணவாளனிடம் சொல்

பெரிய திருமொழி - மூன்றாம் பத்து - ஆறாம் திருமொழி - நான்காம் பாசுரம்

தானாக நினையானேல்* தன் நினைந்து நைவேற்கு* 

ஓர் மீன் ஆய கொடி நெடு வேள்* வலி செய்ய மெலிவேனோ?*

தேன் வாய வரி வண்டே* திருவாலி நகர் ஆளும்*

ஆன் ஆயற்கு என் உறு நோய்* அறியச் சென்று உரையாயே|

017. திவ்ய ப்ரபந்தம் - 1202 - குடந்தைப் பெருமானே! எனக்குத் துணைவனாகுக

பெரிய திருமொழி - மூன்றாம் பத்து - ஆறாம் திருமொழி - ஐந்தாம் பாசுரம்

வாள் ஆய கண் பனிப்ப* மென் முலைகள் பொன் அரும்ப*

நாள் நாளும்* நின் நினைந்து நைவேற்கு* 

ஓ மண் அளந்த தாளாளா தண் குடந்தை நகராளா* 

வரை எடுத்த தோளாளா* என் தனக்கு ஓர்* துணையாளன் ஆகாயே|

018. திவ்ய ப்ரபந்தம் - 1203 - கருட வாகனன் என் வளையும் கவர்வானோ!

பெரிய திருமொழி - மூன்றாம் பத்து - ஆறாம் திருமொழி - ஆறாம் பாசுரம்

தார் ஆய தன் துளவ* வண்டு உழுதவரை மார்பன்*

போர் ஆனைக் கொம்பு ஒசித்த* புள் பாகன் என் அம்மான்*

தேர் ஆரும் நெடு வீதித்* திருவாலி நகர் ஆளும்*

கார் ஆயன் என்னுடைய* கன வளையும் கவர்வானோ?

019. திவ்ய ப்ரபந்தம் - 1204 - மணவாளா! என் கண்ணில் நீ உள்ளாயே!

பெரிய திருமொழி - மூன்றாம் பத்து - ஆறாம் திருமொழி - ஏழாம் பாசுரம்

கொண்டு அரவத் திரை உலவு* குரை கடல்மேல் குலவரை போல்*

பண்டு அரவின் அணைக் கிடந்து* பார் அளந்த பண்பாளா*

வண்டு அமரும் வளர் பொழில் சூழ்* வயல் ஆலி மைந்தா* 

என் கண் துயில் நீ கொண்டாய்க்கு* என் கன வளையும் கடவேனோ?

020. திவ்ய ப்ரபந்தம் - 1205 - மணவாளா! உனது நினைவால் தூங்கவே இல்லை!

பெரிய திருமொழி - மூன்றாம் பத்து - ஆறாம் திருமொழி - எட்டாம் பாசுரம்

குயில் ஆலும் வளர் பொழில் சூழ்* தண் குடந்தைக் குடம் ஆடி*

துயிலாத கண் இணையேன்* நின் நினைந்து துயர்வேனோ?*

முயல் ஆலும் இள மதிக்கே* வளை இழந்தேற்கு* 

இது நடுவே வயல் ஆலி மணவாளா* கொள்வாயோ மணி நிறமே?

021. திவ்ய ப்ரபந்தம் - 1206 - மணவாளா! ஒரு நாளாவது என்னைத் தழுவு

பெரிய திருமொழி - மூன்றாம் பத்து - ஆறாம் திருமொழி - ஒண்பதாம் பாசுரம்

நிலை ஆளா நின் வணங்க* வேண்டாயே ஆகிலும்* 

என் முலை ஆள ஒருநாள்* உன் அகலத்தால் ஆளாயே*

சிலையாளா மரம் எய்த திறல் ஆளா* 

திருமெய்ய மலையாளா* நீ ஆள வளை ஆள மாட்டோமே|

||ஹரி ஓம்||

||ஸ்ரீ ஆழ்வார் திருவடிகளே சரணம்||

||ஸ்ரீ எம்பெருமானார் திருவடிகளே சரணம்||

||ஸ்ரீ ஜீயர் திருவடிகளே சரணம்||

||ஸ்ரீ அஸ்மத்  ஆசார்யன் திருவடிகளே சரணம்||

தொடரும்