||ஸ்ரீ:||
||ஸ்ரீமதே ராமாநுஜாய நம:||
||ஸ்ரீமத் வரவர முநயே நம:||
ஸ்ரீ வியாஸ பகவான் அருளிய
ஸ்ரீ விஷ்ணு ஸஹஸ்ர நாம ஸ்லோகம் - 88
ஸுலப⁴ஸ் ஸுவ்ரதஸ் ஸித்³த⁴ஸ்
ஸ²த்ருஜிச் ச²த்ரு தாபந:|
ந்யக்³ ரோதோ⁴ து³ம்ப³ரோ ஸ்²வத்த²ஸ்²
சாணூ ராந்த்⁴ர நிஷூத³ந:||
- 823. ஸுலப⁴ஸ் - அடியவர்க்கு எளியவர். இலைகள், பூக்கள், பழங்கள் போன்றவற்றை முழு பக்தியுடன் சமர்ப்பிப்பதன் மூலம் எளிதில் அடையக் கூடியவர். எளிதில் மகிழ்ச்சி அடைகிறார்.
- 824. ஸுவ்ரதஸ் - சரணம் என்று வந்தவரைக் கட்டாயம் காப்பேன் என்னும் நல்ல, வலுவான விரதம் உடையவர். தன்னலமற்ற பக்தர்களால் நேர்மையுடன் வழங்கப்படும் தூய்மையான உணவை மட்டுமே ஏற்றுக் கொள்பவர். தனது நர, நாராயண அவதாரத்தில் கடுமையான தவம் கடைப்பிடித்தவர். இந்த பிரபஞ்சத்தில் உள்ள அனைத்தையும் கட்டுப்படுத்தி அவற்றை ஒழுங்காக வைத்திருப்பவர். பரமாத்மாவாக இருந்தாலும் தனது கிருஷ்ண அவதாரத்தில் அனைத்து விரதங்களையும் கடுமையாகக் கடைப்பிடித்தவர்.
- 825. ஸித்³த⁴ஸ் - முயற்சியின்றியே தானாகவே அடையக் கூடியவனாக இருப்பவர். யாரையும் அல்லது வேறு எதையும் சார்ந்திருக்காமல், முழுமையாகச் சாதித்தவர். நமக்கு சாஸ்திரங்களைக் கொடுத்தவர். மங்களத்தை அளிப்பவர். தனது அனைத்து முயற்சிகளையும் குறைபாடில்லாமல் முழுமையாக நிறைவேற்றுகிறார்.
- 826. ஸ²த்ருஜிச் ச²த்ரு தாபநஹ - பகைவரை வென்றவர் மூலம் பகைவர்க்குத் துன்பம் தருபவர். அவர் தேவர்களின் எதிரிகளை வென்று அவர்களை துன்புறுத்துகிறார். எப்போதும் வெற்றியாளராக இருப்பார்.
- 827. ந்யக்³ ரோதோ⁴ து³ம்ப³ரோ - தான் உயர்ந்தவனாயினும், தாழ்ந்த நிலையிலுள்ள அடியார்கட்குக் கட்டுப்படுபவர். மஹாலக்ஷ்மியுடன் கூடிய உன்னதமான, மகத்துவமான அனைத்தையும் கொண்ட பரம இருப்பிடத்தை உடையவர். ஆனால் கூப்பிய கைகளுடன் தன்னை அணுகும் பக்தர்களின் கட்டளைக்கு இணங்குபவர். ஆதிமூலமானவர், எல்லாவற்றிற்கும் மேலாக இருப்பவர். உறுதியாக வேரூன்றி, பிரபஞ்சத்தின் வடிவில் எல்லாத் திசைகளிலும் விரிந்து கிடப்பவர். அவரை வழிபடுபவர்களால் அவர்களின் இதயங்களில் விரும்பப்படுபவர்
- 828. அஸ்²வத்த²ஸ்² - தேவர்கள் மூலமாக உலகங்களை நியமித்து ஆள்பவர். பல்வேறு செயல்பாடுகளைச் செய்வதற்கு நிலையற்ற கடவுள்களை நிறுவியவர். சம்சாரத்தின் நித்ய அஸ்வத்த மரத்தின் வேர் என்று வர்ணிக்கப்படுபவர். எப்போதும் ஒரே மாதிரியாக இல்லாத பிரபஞ்சத்தை நித்யமாக ஆள்பவர், தொடர்ந்து மாறிக் கொண்டே இருப்பார். ஐம்பெரும் கூறுகளின் வடிவில் பிரபஞ்சம் முழுவதும் வியாபித்திருப்பவர்.
- 829. சாணூ ராந்த்⁴ர நிஷூத³நஹ - இந்திரனுக்குப் பகைவனான சாணூரன் என்னும் பெயருடைய மல்லனைக் கொன்றவர்.
||ஹரி ஓம்||
||ஸ்ரீ ஆழ்வார் திருவடிகளே சரணம்||
||ஸ்ரீ எம்பெருமானார் திருவடிகளே சரணம்||
||ஸ்ரீ ஜீயர் திருவடிகளே சரணம்||
||ஸ்ரீ அஸ்மத் ஆசார்யன் திருவடிகளே சரணம்||
தொடரும்
No comments:
Post a Comment