108 திவ்ய தேசங்கள் - 031 - திருச்செம்பொன்செய் கோவில் 3

||ஸ்ரீ:||

||ஸ்ரீமதே ராமாநுஜாய நம:||

||ஸ்ரீமத் வரவர முநயே நம:||

031. திருச்செம்பொன்செய் கோவில் (திருநாங்கூர்)

முப்பத்தி ஒன்றாவது திவ்ய க்ஷேத்ரம்

இந்த திவ்ய தேசத்திற்கான பாசுரங்கள் - 10

001. திவ்ய ப்ரபந்தம் - 1268 - திருமாலைச் செம்பொன்செய் கோயிலில் கண்டேன்

பெரிய திருமொழி - நான்காம் பத்து - மூன்றாம் திருமொழி - முதலாம் பாசுரம்

பேர் அணிந்து உலகத்தவர் தொழுது ஏத்தும்* பேர் அருளாளன் எம் பிரானை*

வார் அணி முலையாள் மலர் மகளோடு* மண் மகளும் உடன் நிற்ப*

சீர் அணி மாட நாங்கை நல் நடுவுள்* செம்பொன்செய் கோயிலினுள்ளே*

கார் அணி மேகம் நின்றது ஒப்பானைக்* 

கண்டு கொண்டு உய்ந்து ஒழிந்தேனே||

002. திவ்ய ப்ரபந்தம் - 1269 - வானவர்கோன் வாழ்விடம் இக்கோயில்

பெரிய திருமொழி - நான்காம் பத்து - மூன்றாம் திருமொழி - இரண்டாம் பாசுரம்

பிறப்பொடு மூப்பு ஒன்று இல்லவன் தன்னைப்* பேதியா இன்ப வெள்ளத்தை*

இறப்பு எதிர் காலம் கழிவும் ஆனானை* ஏழ் இசையின் சுவை தன்னை* 

சிறப்பு உடை மறையோர் நாங்கை நல் நடுவுள்* 

செம்பொன்செய் கோயிலினுள்ளே*

மறைப் பெரும் பொருளை வானவர் கோனை* 

கண்டு நான் வாழ்ந்து ஒழிந்தேனே|

003. திவ்ய ப்ரபந்தம் - 1270 - கடல் நிற வண்ணனைக் காணலாம் இங்கே

பெரிய திருமொழி - நான்காம் பத்து - மூன்றாம் திருமொழி - மூன்றாம் பாசுரம்

திட விசும்பு எரி நீர் திங்களும் சுடரும்*

செழு நிலத்து உயிர்களும் மற்றும்*

படர் பொருள்களும் ஆய் நின்றவன் தன்னை*

பங்கயத்து அயன் அவன் அனைய* 

திட மொழி மறையோர் நாங்கை நல் நடுவுள்*

செம்பொன்செய் கோயிலினுள்ளே*

கடல் நிற வண்ணன் தன்னை நான் அடியேன்*

கண்டு கொண்டு உய்ந்து ஒழிந்தேனே|

004. திவ்ய ப்ரபந்தம் - 1271 - அலைகடல் துயின்றவன் அமரும் கோயில் இது

பெரிய திருமொழி - நான்காம் பத்து - மூன்றாம் திருமொழி - நான்காம் பாசுரம்

வசை அறு குறள் ஆய் மாவலி வேள்வி* மண் அளவிட்டவன் தன்னை*

அசைவு அறும் அமரர் அடி இணை வணங்க* அலை கடல் துயின்ற அம்மானை*

திசைமுகன் அனையோர் நாங்கை நல் நடுவுள்* 

செம்பொன்செய் கோயிலினுள்ளே*

உயர் மணி மகுடம் சூடி நின்றானைக்* கண்டு கொண்டு உய்ந்து ஒழிந்தேனே|

005. திவ்ய ப்ரபந்தம் - 1272 - தசரதன் மகனை இக்கோயிலில் காணலாம்

பெரிய திருமொழி - நான்காம் பத்து - மூன்றாம் திருமொழி - ஐந்தாம் பாசுரம்

தீ மனத்து அரக்கர் திறல் அழித்தவனே என்று* சென்று அடைந்தவர் தமக்கு*

தாய் மனத்து இரங்கி அருளினைக் கொடுக்கும்* தயரதன் மதலையை சயமே* 

தே மலர்ப் பொழில் சூழ் நாங்கை நல் நடுவுள்* 

செம்பொன்செய் கோயிலினுள்ளே*

காமனைப் பயந்தான் தன்னை நான் அடியேன்* 

கண்டு கொண்டு உய்ந்து ஒழிந்தேனே|

006. திவ்ய ப்ரபந்தம் - 1273 - கடலில் அணை கட்டியவனைக் கண்டேன்

பெரிய திருமொழி - நான்காம் பத்து - மூன்றாம் திருமொழி - ஆறாம் பாசுரம்

மல்லை மா முந்நீர் அதர்பட* 

மலையால் அணை செய்து மகிழ்ந்தவன் தன்னை*

கல்லின் மீது இயன்ற கடி மதிள் இலங்கை கலங்க* ஓர் வாளி தொட்டானை* 

செல்வ நான்மறையோர் நாங்கை நல் நடுவுள்* 

செம்பொன்செய் கோயிலினுள்ளே*

அல்லி மா மலராள் தன்னொடும் அடியேன்* 

கண்டு கொண்டு அல்லல் தீர்ந்தேனே|

007. திவ்ய ப்ரபந்தம் - 1274 - கஞ்சனைக் காய்ந்த காளையைக் காணலாம்

பெரிய திருமொழி - நான்காம் பத்து - மூன்றாம் திருமொழி - ஏழாம் பாசுரம்

வெம் சினக் களிறும் வில்லொடு மல்லும்*

வெகுண்டு இறுத்து அடர்த்தவன் தன்னை*

கஞ்சனைக் காய்ந்த காளை அம்மானைக்* கரு முகில் திரு நிறத்தவனை* 

செஞ்சொல் நான்மறையோர் நாங்கை நல் நடுவுள்*

செம்பொன்செய் கோயிலினுள்ளே*

அஞ்சனக் குன்றம் நின்றது ஒப்பானைக்* கண்டு கொண்டு அல்லல் தீர்ந்தேனே|

008. திவ்ய ப்ரபந்தம் - 1275 - வேங்கடவாணனே இக்கோயிலில் உள்ளான்

பெரிய திருமொழி - நான்காம் பத்து - மூன்றாம் திருமொழி - எட்டாம் பாசுரம்

அன்றிய வாணன் ஆயிரம் தோளும் துணிய* அன்று ஆழி தொட்டானை*

மின் திகழ் குடுமி வேங்கட மலை மேல்* மேவிய வேத நல் விளக்கை* 

தென் திசைத் திலதம் அனையவர் நாங்கைச்* 

செம்பொன்செய் கோயிலினுள்ளே*

மன்று அது பொலிய மகிழ்ந்து நின்றானை* 

வணங்கி நான் வாழ்ந்து ஒழிந்தேனே|

009. திவ்ய ப்ரபந்தம் - 1276 - அடியவரின் உள்ளத்தில் ஊறும் தேன்

பெரிய திருமொழி - நான்காம் பத்து - மூன்றாம் திருமொழி - ஒண்பதாம் பாசுரம்

களங்கனி வண்ணா கண்ணனே என் தன்* கார் முகிலே என நினைந்திட்டு*

உளம் கனிந்திருக்கும் அடியவர் தங்கள்* உள்ளத்துள் ஊறிய தேனை* 

தெளிந்த நான்மறையோர் நாங்கை நல் நடுவுள்* 

செம்பொன்செய் கோயிலினுள்ளே*

வளம் கொள் பேர் இன்பம் மன்னி நின்றானை* 

வணங்கி நான் வாழ்ந்து ஒழிந்தேனே|

010. திவ்ய ப்ரபந்தம் - 1277 - உலகை ஆண்டு தேவரும் ஆவர்

பெரிய திருமொழி - நான்காம் பத்து - மூன்றாம் திருமொழி - பத்தாம் பாசுரம்

தேன் அமர் சோலை நாங்கை நல் நடுவுள்* செம்பொன்செய் கோயிலினுள்ளே*

வானவர் கோனைக் கண்டமை சொல்லும்* மங்கையார் வாள் கலிகன்றி*

ஊனம் இல் பாடல் ஒன்பதோடு ஒன்றும்* ஒழிவு இன்றிக் கற்று வல்லார்கள்*

மான வெண் குடைக்கீழ் வையகம் ஆண்டு* வானவர் ஆகுவர் மகிழ்ந்தே|

||ஹரி ஓம்||

||ஸ்ரீ ஆழ்வார் திருவடிகளே சரணம்||

||ஸ்ரீ எம்பெருமானார் திருவடிகளே சரணம்||

||ஸ்ரீ ஜீயர் திருவடிகளே சரணம்||

||ஸ்ரீ அஸ்மத்  ஆசார்யன் திருவடிகளே சரணம்||

தொடரும்